曹仁超: 金價高過800美元勿追

面對信貸危機不斷擴大，根據CNBC統計，政府投入金融系統資金已達4.9284萬億美元，已超過第二次世界大戰美國參軍總費用，唔少人又再擔心通脹令金價上升。

家吓過量增加嘅貸款（Loans）並非貨幣供應（Money Supply），除非接受貸款嘅銀行倒閉，令呢D貸款變成壞賬（New Debt），聯儲局必須將它貨幣化（Monetize）。理論上唔應該刺激通脹率上升，例如10月份PPI指數回落2.8%（因汽油價格跌24.9%），係1947年以來最大單月跌幅；能源產品價格10月份亦回落12.8%，係1986年以來最大跌幅，甚至食物價格亦回落0.2%；10月份CPI亦回落1%，係1947年以來最大跌幅，扣除食品及能源嘅核心CPI亦回落0.1%。

10月份新建房屋下跌38%（較2006年年初最高峰下跌65%），汽車銷量更令人擔心。

換言之，金價上升係炒錯市；人們將貸款睇成貨幣。

我老曹同意金價最終會上升，但係咪家吓已開始上升？木宰羊。如股市、油價及其他商品價格回落（指依家至明年第二季），金價應再回落到630美元後才上升；金價未見630美元便上升，只因近日各國央行大量供應貨幣，產生Flight to Quality現象，但未反映通縮威力。已低價買金者不妨繼續持有，未買金者千祈咪喺800美元以上追貨。黃金只宜低吸，不應追貨。現階段股市亦只應响大反彈後減持，而毋須低價止蝕；經過十二個月大跌市後，股市正進入低價牛皮，冇永遠下跌嘅股市，亦冇永遠上升嘅金價。

2008年11月27日 信報財經新聞